Racheengel Else Kling

13
Mrz
2020

Racheengel Else Kling

Else-Kling

Vorgetragen auf unserer Demo am 14. März 2020 in Berlin
gegen die Absetzung der Fernsehserie "Lindenstraße"


Griaß Gott, Saupreißn in Berlin!
I woaß net, Preißn, kennts ia mi? – Naa? – Joo!
I woar dem Hausmoasta sei Frau
in dera Lindenstroß, genau.

Des is lang her, scho vierzehn Joahr.
Do bin i gstorbn, weils Zeit scho woar.
Mir is des recht, ihr wissat ja,
i kann eh schweign wiara Grab!

Grad schee woars druntn in da Gruft,
als auf amoi a Stimm mi ruft.
A Rab hot auf mei Grab drauf gschissn,
hot gschrien, i müsst des Neuste wissn.

"Do drom is Sodom und Gomera,
weil z Minga dia großkopfat Herra
ham gsagt, dia oide Lindenstroß,
die wolln ma net, Pfiats eich, des woars!

Dia Zuschaua wern gar net gfragt,
des Zwangsgeld wird scho eingesackt.
Des is wia vor fünfhundert Joahrn,
als d Baura no leibeigen woarn.

Der Geißendörfer is net hier.
Mei, der hot kämpft grad wiara Stier.
Do hams eam glei des Mei verbotn,
jetz muass er stad sei wia dia Dotn.

Dia ganze Stroß wird abgerissn,
dia ganzn Leit san angeschissn,
dia Beimerin war au fast dot.
Ach bittschön, hülf uns in der Not!"

Do hob i mi im Grab umdreht,
hob gsagt: "Mei Egon, i muss geh!"
Drauf hob i gschwind mein Besn packt,
bin wia da Wind auf d Erdn gjagt.

Bin glei zur ARD neiganga,
hob gfragt: "Wollts eich a Watschn fanga?
Da Deifi dat scho recht lang wartn
auf eich, Herr Herres und Konsorten.

Da Herrgott bstellt eich: Passts fei auf,
sunst kimmts ia net in Himmi nauf!
A schwere Sünd hobts ihr begangen,
No hobts a Frist, neu anzufangen.

Wenns schee macht, eia Scheißprogramm,
dann wolltat ma des scho gern ham.
Ist d Lindenstroß nimmer dabei,
dann schmeiß ma alls in d Mülltonn nei."

Do hams bleed gschaut, dia hohen Herrn,
ham gsagt: "Scho recht, wia nehmat gern
die Lindenstroße wiada nei,
am bestn glei auf Bayern 3."

Hob i des träumt? Des war grad schee!
Dann könnt i in mei Grab nei geh
und mit meim Egon Fenseh schaun.
Mei, is des net a scheena Traum?

Leit, dreimoi hobts ia no die Freid,
dann hots an End, dia scheene Zeit!
Kämpfts weita fia die Lindenstroß,
dass wiedakimmt! Pfiats eich, des woars.

(Bild: EO Reinhardt)
393 mal gelesen
logo

Verlorenes Paradies

Halbe Frau

Inhalt

Verlorenes Paradies